भैरहवा । रुपन्देहीको मर्चवारमा दुर्गा मूर्ति विसर्जनको क्रममा ३ जना वेपत्ता मध्ये २ जनाको शव फेला परेको छ ।
कोटहीमाई गाँउपालिका वडा नं. १ र ५ को सिमानाको रुपमा रहेका दुईमोहन नदीमा मूर्ति विसर्जनको क्रममा ३ जना दिउसो २ बजे नदीमा बेपत्ता भएका थिए, स्थानीय, सुरक्षाकर्मी र गोताखोरहरुबाट खोजतलाश गरी २ जनाको शव नदीबाट निकालेको छ ।
मृत्यु हुनेमा कोटहीमाई गाउँपालिका वडा नम्बर १ बस्ने २४ बर्षिय अजय कुमार नाउँ र १८ वर्षीय अजय राजभर रहेको छ भने सोही ठाउका २० वर्षीय सन्त कुमार राजभर अझै बेपत्ता रहेका रुपन्देही प्रहरी प्रमुख एसपी भरत बहादुर विश्वकर्माले जानकारी दिए । स्थानीय, सुरक्षाकर्मी र गोताखोरहरुले बेपत्ता राजभरको खोजी गरिरहेको एसपी विश्वकर्माले बताए ।
नाउ प्रहरी जवान समेत रहेको र बचाउका लागि खोलामा गएको स्थानीयले बताएका छन । कोटहीमाई १ अमरगंजको मुर्ति विसर्जनको क्रममा स्थानीयहरुले मुर्ति विसर्जन गरेपछि थप केही युवाहरु मुर्ति नदीको भित्री भाग तर्फ लैजाने क्रममा ति मध्ये ३ जना वेपत्ता भएका स्थानीयले जानकारी दिएका छन ।
दानव नदी र तिनाउ नदीको संगमस्थल रहेको उक्त क्षेत्रमा विगतबाट नै मुर्ति विसर्जन हुदै आएको छ । सोही स्थानमा विगत वर्ष पनि मुर्तिविसर्जनको क्रममा युवाको डुबेर मृत्यु भएको थियो ।
