तीनवटा वायु प्रणाली एकसाथ सक्रिय हुँदा भएको वर्षा मंगलबारदेखि थामिने भएको छ । मौसम पूर्वानुमान महाशाखाका अनुसार आइतबारबाट सुरु भएको वर्षा सोमबार पूर्वी, मध्यसहित पश्चिममा सक्रिय थियो । तर, पश्चिम बंगालआसपासमा बनेको न्यूनचापीय प्रणालीको प्रभाव घट्नुका साथै पश्चिमी र स्थानीय वायु पनि कमजोर बनेपछि वर्षा थामिएको हो ।
पोखरामा २४ घण्टामा ४० मिलिमिटर वर्षा भएको छ । ओखलढुंगामा १३, काठमाडौंमा ८.५ र जिरीमा ३.८ मिलिमिटर वर्षा मापन भएको छ । सोमबार दिनभर काठमाडौंको आकाश बादलले ढाकेको थियो । महाशाखाका अनुसार मंगलबार कोशी प्रदेश र देशका पहाडी भू–भागमा बदली रहनेछ भने अन्य क्षेत्रमा मौसम सफा रहनेछ । मंगलबार कोशी प्रदेश र मुलुकका अन्य पहाडी भू–भागका एक–दुई स्थानमा हल्कादेखि मध्यम वर्षाको आकलन गरिएको छ । उच्च पहाडी तथा हिमाली भूभागका थोरै स्थानमा हिमपातको सम्भावना छ ।
पोस्ट मनसुन सुरु भएसँगै अधिकतम र न्यूनतम तापक्रम पनि घट्न थालेको छ । तर, बादल नलागेको दिन भने अझै पनि चर्काे घाम लाग्ने गरेको छ । जल तथा मौसम विज्ञान विभागले यस वर्ष मध्यपुससम्म औसतभन्दा धेरै वर्षा हुने, तर अधिकतम र न्यूनतम दुवै तापक्रम पनि सरदरभन्दा धेरै हुने आकलन गरिसकेको छ ।
